Category : Jarduerak

Azaroaren 17an, larunbata, Smith-Magenis Sindromearen Nazioarteko Eguna izango da. Sindrome hori hainbat sintoma eta osasun arazo dakartzan asaldura genetikoa da.

Dbusek bat egin nahi du ASME Erakundeak (Smit-Magenis Sindromearen Espainiako Elkartea) antolatutako jarduerekin, gaixotasuna gehiago ezagutzeko asmoz, eta babesa eskaini nahi die egunero gaixotasun horri aurre egiteko borrokatzen diren pertsona guztiei. Horregatik, Donostiako hiri autobus guztiek kanpainarekin lotutako kartela eramango dute bihar egun osoan zehar.

Dbusek eta San Martin Azokak 2018ko “Dbus eta Gabonak” haurren marrazketa lehiaketa antolatu dute. Oraingoa hamabigarren edizioa da eta aurreko urteetan arrakasta handia izan du 13 urtetik beherako haurren artean.

Sormena bultzatzeaz gain, lehiaketarekin haurrei Donostian garraio publikoa erabiltzearen garrantzia transmititu nahi zaie, hiri-espazioen jasangarritasuna eta hiritarren bizi kalitatea bermatzeko. Izan ere, mugikortasuna hobetzeko garraio publikoaren erabilera ezinbestekoa izaten da Gabonetan.

LEHIAKETAREN OINARRIAK

Parte hartzailea 13 urtetik beherako edozein haur izan daiteke eta gai libreko marrazki bat egin beharko du. Baldintza bakarra Gabonen inguruko ideia bat azaltzea izango da, autobusarekin erlazionatuta.

Marrazkiak FNACeko erakusmahaian utziko dira (San Martin Azoka) edo Dbusen (Fernando Sasiain 7 kalea), eta parte hartzailearen datuak idatzi beharko dira atzealdean:

• Izen-abizenak
• Adina
• Jaiotze data
• Helbidea
• Telefonoa eta harremanetarako posta elektronikoa
• Ikastetxea
• Baimendutako tutorearen izenpea

Ezinbestekoa da datu pertsonal guztiak adieraztea. Bestela, marrazkia lehiaketatik baztertuta geratuko da. Derrigorrezkoa izango da, halaber, formularioa betetzea parte hartzailearen legezko tutoreen baimenarekin (Pdf-a deskargatu).

Bi kategoria egongo dira:

• A Kategoria: 8 urte artekoa, hau da, 2010ean edo geroago jaiotako haurrentzat.
• B Kategoria: 9 eta 12 urte artekoa; hau da, 2006an, 2007an, 2008an edo 2009an jaiotako haurrek parte hartu ahal izango dute.

Marrazkiak jasotzeko azken eguna 2018ko azaroaren 16a izango da.

SARIAK

Epaimahaiak, Dbusek izendatuko baita, kategoria bakoitzeko marrazki irabazleak hautatuko ditu.

• Lehen saria: Txartel pertsonal eta eskualdaezina, Dbuseko autobusetan nahi beste erabiltzeko, 2019ko 6 hilabetetan + LENOVO 8” Tableta.
• Bigarren saria: Txartel pertsonal eta eskualdaezina, Dbuseko autobusetan nahi beste erabiltzeko, 2019ko 3 hilabetetan + SONY DSC 810 kamera.
• Hirugarren saria: Txartel pertsonal eta eskualdaezina, Dbuseko autobusetan nahi beste erabiltzeko, 2019ko 3 hilabetetan + Liburu sorta eta idazketarako sorta.
• Gainerako finalistek (4. postutik 10.era) Diploma bana jasoko dute.

Sarien banaketa ekitaldia abenduaren 15ean, larunbata, goizeko 12:00etan egingo da San Martin Azokan, FNACen aretoan. Finalista izan direnei telefonoz jakinaraziko zaie aldez aurretik.

Dbusek marrazkiak hedatu, publikoki erakutsi eta erreproduzitzeko eskubidea bere gain hartzen du, marrazkien egileek, euren lanaren autoretza onartzen zaielarik, inolako eskubiderik sortzen ez dutelarik. Marrazkiak Dbusen marketin kanpainetan erabiliak izan daitezke.

Lehiaketarako izena ematean parte hartzaileek ematen dituzten datuak Dbusen jabegokoa den fitxategi batean sartuko dira beraien tratamendurako, eta lehiaketan parte hartzea kudeatzeko erabiliko dira. Dbusen Pribatutasun Politikari buruz edota interesdunak honi lotuta dituen eskubideen erabileraz gehiago jakiteko, begiratu www.dbus.eus web orrian.

Marrazki finalistak DVbusen erakutsiak izango dira abenduan zehar eta Dbus eta San Martin Azokaren webguneetan azalduko dira. Halaber, marrazkiak horretarako egokitutako leku publikoetan erakutsi ahal izango dira. Erakusketa amaitu ondoren, marrazkiak gorde egingo dira zaintzapean, hilabete bateko epean.

Kartela ikusi (pdf)

Urriaren 1ean Habitataren Munduko Eguna izango dela eta, Dbusek eta Cristina Enea Fundazioak indarrak batu dituzte Donostiako fauna eta flora autoktonoa ezagutarazteko, horretarako hiriko autobus markesinak erabiliz.

“Hurrengo Geltokia: hiriko natura” da kanpainaren leloa, eta Hiri Berdearen jardueretako bat izanik, bere helburua da Donostiako ingurune naturala ezagutaraztea eta balioestea eta garraio publikoa bultzatzea, hiritik mugitzeko modu iraunkorra den heinean.

Horrela, Donostiako hainbat animalia espezie eta gune natural aukeratu dira, haien gaineko informazioa eman ahal izateko. Animalia espezie eta gune natural horien kokalekuetatik hurbilen dauden Dbus geltokietan emango da esandako informazioa. Donostiarrentzat oso ezagunak ez diren espezieak eta guneak dira eta autobus geltokiak hiriko leku estrategikoetan daude, espezie eta gune horien kokalekuetatik oso hurbil. Hiriko ingurunean, non erakinak gero eta ugariagoak diren, ohikoa da natura ezkutuan eta bigarren planoan gelditzea. Halere, Donostiak natura aberatsa dauka, hainbat leku edo gunetan dibertsifikatuta.

Ildo horretan, hainbat auzotako 10 geltokitan binilo batzuk jarri dira, interesgune hauen gaineko informazioarekin:

– Cristina Enea Parkea → Frantziskotarrak (Egia)

– Ibaetako Haritza → Irakasle Eskola (Antigua)

– Ametzagainako Parkea → Garbera

– Urgulleko sugandila → Boulevard

– Ulia Mendia → Gaiztarro (Bidebieta)

– Uliako ur biltegiak → Toki Eder (Ategorrieta)

– Ondarretako marearteko zabalgunea  → Londres Hotela

– Muga kretazeoa/Paleozenoa → Ondarreta eta Zumalakarregi 21

– Altzako bioaniztasuna → Arri Berri (Altza)

Liburuxka batean ere jaso da informazio hori, eta liburuxka hori Dbusen web orrian, Cristina Eneako Ingurumen Baliabideen Etxean eta kultur zentroetan eskuratu daiteke.

Ipuin kontalariak Dbuseko autobus batean

Urriaren 5ean, ostirala, 4 eta 8 urte bitarteko haurrentzako ipuin kontalarien saioak egongo dira Alderdi Ederreko lorategietan, non Dbuseko autobus bat jarriko den. 30na minutuko 3 saio egongo dira, euskaraz: 17:30ean, 18:15ean eta 19:00etan.

Ipuin kontalarien saio horietan naturarekin lotura duten istorio batzuk kontatuko zaizkie haurrei, hiriko naturaren aberastasunari eta Dbusen ikurrari, alegia, galzorian dagoen eta Donostiako alde batzuetan existitzen den Euskal Herriko  hegoaldeko zuhaitz igelari, keinu bat eginda.

Liburuxka ikusi (pdf)

Irailaren 16tik 22ra arte Mugikortasun Iraunkorraren Europako Astea ospatuko da eta, hori dela-eta, Dbusek “Zurekin edonora” kanpaina abian jarri du, Donostiako Udalaren Mugikortasun Departamentuak aste horretarako bultzatu duen programaren barruan, garraio publikoaren erabilera bultzatzeko eta autobusetan elkarbizitza sustatzeko, erabiltzaileen artean autobusa errespetuz eta elkartasunez erabiltzea bultzatuta.

Kanpainarekin, “Laguntzaileak” ekimenari jarraipena eman nahi zaio, zeina pasa den maiatzean abian jarri baitzen autobusa belaunaldi desberdineko pertsonen arteko elkarbizitza gune gisa sustatzeko eta autobusetan seguru eta eroso bidaiatzeko aholku praktiko batzuk emateko. Aurreko kanpainan arrapala nola erabili edo haur-aulki batekin autobusera nola igo azaltzen zen, besteak beste, eta oraingoan, berriz, antolatutako jarduerekin autobusa ondo erabiltzeko eta autobusean bidaiatzen duten gainerako pertsonak aintzat hartzeko mezua bidali nahi da, hainbat ideia azpimarratuta. Esaterako, aipatzen da garrantzitsua dela autobusean azkarrago sartzea eta autobus barruan ibiltzea erraztea, autobusaren barruan paketeak egoki garraiatzea, ibilgailua ez zikintzea edo musika bolumen altuan eramanda beste erabiltzaileak ez molestatzea.  Hitz batean, helburua da Dbusen bidaiatzen duten pertsona guztien esperientzia hobetzea, baita gidariena ere.

Horretarako, bi jarduera osagarri antolatu dira autobusen barruan, irailaren 19, 20 eta 21erako. Hauek dira jarduerak:

– Perchinga mezu praktikoekin, autobusetan:  hiru egun horietan autobusen barruko barretan denontzat bidaia atseginagoa izateko 7 aholku egongo dira.

– Mikroantzerkia autobusetan: antzezpen batzuk dira, erabiltzaileei autobusetan gertatu ohi diren egoerak modu atseginean eta entretenigarrian azaltzeko, eta garraio publikoa leku atseginagoa egiten duten praktika onez ohartarazteko. Perchinga autobusen barruko barretan jarriko den egun berberetan egingo dira antzezpenak. Euskaraz eta gaztelaniaz izango dira, 11:30etik 13:30era eta 16:30etik 18:30era, Dbuseko hainbat lineatan.

Mugikortasun Iraunkorraren Europako Astea 2002az geroztik ospatzen da, eta garraio publikoaren erabilera sustatzea eta ingurumenarekin arduratsua den mugikortasunaren garrantziaz sentsibilizatzea dira bere helburua. Edizio honetan, Europako 1.800 udalerri inguruk parte hartuko dute, eta Donostiakoa da horietako bat. Ildo horretan, Dbusen kanpainaren asmoa da autobusaren erabilera sustatzea eta erabiltzaileak ohartaraztea autobusa ondo erabiltzea garrantzitsua dela bidaiaren esperientzia hobetzeko.

“Laguntzaileak” aurreko kanpaina bezala, “Zurekin edonora” kanpaina ere Donostiako Udalak bultzatutako Goazen Donostia estrategiaren barruan sartzen da. Estrategia horrekin, Donostiako Udalak nahi du gure hiria eta Dbuseko autobusak elkargune eta elkarbizitzarako leku lagunkoiak izatea.  

Informazio gehiago