Dbusek bat egiten du apirilaren 8an ospatuko den ijito herriaren nazioarteko egunarekin.
Horregatik, egun horretan Donostiako hiri autobus guztiek ijitoen bandera eramango dute egun osoan zehar, Dbus herri horren aitorpena bultzatu eta ijitoen komunitatea errespetatuta beraiekin batera bizitzen lagunduko duten jardueren alde dagoela erakusteko.
Dbusek 2013ko ekitaldiari dagokion Erantzukizun Sozial Korporatiboari buruzko Memoria argitaratu du. Memoria web orri honetan bertan dago eskuragarri.
2013ko memoria Dbusek urtean zehar bai enpresaren barruan bai kanpoan egin dituen ekintzen laburpen zehatza da. Memoriak alderdi ekonomikoak, sozialak eta ingurumenekoak hartzen ditu bere baitan, eta, besteak beste, eskainitako zerbitzuarekin lotutako alderdiak, egindako jarduketak, autobusen flotari buruzko datuak eta Dbus partaide izan deneko proiektuak zein 2013an egin dituen ezarpen teknologikoak zehazten ditu.
Era berean, bidaiari kopuruak eta garraio titulu desberdinen erabilera aztertzen dira, bai eta Konpainiak izan dituen emaitza ekonomikoak eta Espainian zein nazioartean eskuratu dituen sariak ere. Txostenak, halaber, Konpainiaren eta bere antolamenduaren deskribapen zabala eskaintzen du.
Memoriak azpimarratu egiten du Dbusek alderdi sozial, ekonomiko eta ingurumenekoekin zein bere langileekin hartutako konpromisoaren isla garbia diren kudeaketa etikoa eta garapen iraunkorra, kudeaketan eta zerbitzuaren kalitatean bikaintasuna lortze aldera enpresak egindako apustuaren baitan sartzen direnak.
Dbus ahalegin handia egiten ari da hiria gero eta hobea izan dadin, gero eta bizigarriagoa, gizatiarragoa eta iraunkorragoa. Hiriaren erronka estrategiko horretan, funtsezko zutabea dira autobusa eta garraio publikoa erabiltzen duten pertsona guztiak.
Erlazionatutako lineak: 05, 25
Otsailaren 17tik aurrera, Dbusek Zuatzuko eta Añorgako autobus zerbitzua hobetuko du, Benta Berriko linearen (5 linea) eta Benta Berri-Añorgako linearen (25 linea) ibilbideak luzatuta, alde horietako bizilagunen eta langileen premiei erantzuteko.
IBILBIDEA LUZATZEA BENTA BERRIKO LINEAN (5 LINEA)
Dbusek bi geltoki gehiago jarriko ditu Zuatzuko enpresa parkearen barruan, eremuan zerbitzu zabalagoa emateko, gaur egun enpresa parkearen sarrerako geltokia baino ez dute-eta.
Geltoki berriak Zuatzu-Urola eta Zuatzu-Ulia eraikinen parean kokatuko dira, eta autobusak enpresa parkeko kale nagusitik ibiliko dira. Autobusak Boulevardetikaterako dira, goizeko 9:00etan hasiko dira, eta 20 minutuko maiztasunez ibiliko dira.
Goizeko 7:00etatik 9:00etara zerbitzua Zuatzuko geltokiraino emango da, beti bezala, 6-8 minutuko maiztasunez.
> Linearen ibilbide berria ikusi
IBILBIDE BERRIA AÑORGAKO ERDIGUNETIK BENTA BERRI-AÑORGA LINEAN (25 LINEAN)
Benta Berri-Añorga lineak (25 linea) beste ibilbide bat egingo du Añorgako erdigunearen eta Belartzaren artean, Karmengo Amaren aldeari zerbitzua emateko, orain arte alde horretan ez baitzegoen garraio publikorik. Horrela, autobusak Karmengo Amatik eta Errotazarretik ibiliko dira, Belartzara iritsi arte eta handik ohiko ibilbidearekin jarraitzeko, Errekalde IIraino.
Neurri horrekin, Añorgako alde horretako bizilagunei zerbitzu hobea emateaz gain, linearen puntualtasuna hobetuko da, ibilbidea egiteko denbora gutxiago beharko delako.
Benta Berri-Añorga 25 linearen zerbitzua, Añorgara, Boulevardetik ateratzen da eta 20 minutuko maiztasunez ibiliko da lanegunetan eta 30 minutuko maiztasunez larunbat eta jaiegunetan. Zerbitzu guztiak Belartzako industrialderaino helduko dira, Errekalden bukatzeko.
Dbusek hiriko autobusetan ordainketa telefono mugikorren bitartez egiteko proiektuaren beste fase bati ekin dio. Fase berrian Konpainiako autobusetan ohiko bidaiari diren 50 lagunek hartuko dute parte.
Telefono mugikorretako teknologien aurrerapenei esker, etorkizunean gero eta errazagoa eta erosoagoa izango da bidai txartelaren ordainketa egitea garraio publikoan; izan ere, laster posible izango da eguneroko zerbitzu asko gailu bakar batez egitea. NFC teknologia da (Near Field Technology) hurbilen ditugun aurrerapen horietako bat. Berarekin posible da telefono mugikorraren SIM txartelean ordainketa txartel adimenduna emulatzea, mugikorra billeteak baliozkotzeko makinara hurbilduta autobus billetea ordaintzeko aukera emanez. Gainera, sistemak aukera ematen du txartela mugikorrarekin zuzenean kargatzeko, baimendutako establezimendu batera edo salmenta gune batera joan beharrik izan gabe.
Pasa den ekainean Donostian egin zen Garraio Sistema Adimenduei buruzko XIII. Kongresuan Dbusek azaldu zuenez, 2011z geroztik Dbusek NFC proiektu pilotu bat dauka abian jarrita, eta proiektu horretan 10 erabiltzailek autobusa telefono mugikorraren bitartez ordaintzeko sistema bat probatu dute. Orain hasiko den bigarren fasean, Proiektua jada garraio txartela duten beste 50 erabiltzailerengana helduko da. Erabiltzaile berri horiek Dbusen ohiko bidaiak egin ahal izango dituzte billetea telefono mugikorrarekin ordainduta. Deskontuak orain arteko berberak izango dituzte, baina billetea ordaintzeko modua errazagoa izango dute.
Proiektuan, nahi duten erabiltzaileek parte hartu ahal izango dute, eta, horregatik, izena emateko prozesuari hasiera ematen zaio. Izena Dbuseko web orri honetan bertan eman ahal izango da, eskabide formularioa betez. Proiektuan parte hartu ahal izateko, beharrezkoa da Mugi edo Lurraldebus txartel arrunta edukitzea, bai eta Movistarreko telefono mugikorra ere (Samsung Galaxy SIII edo Blackberry), 7.0 baino bertsio txikiagoko sistema eragilearekin eta NFC sistemarekin.
Hasieran Proiektua terminal horietarako baino ez bada ere, espero dugu Proiektuaren beraren aurrerapenekin poliki-poliki Telefoniako beste operadore batzuen beste terminal batzuekin ere erabili ahal izatea.
Proiektuaren fase honetan parte hartzeko, jasotzen diren lehen 50 eskabideak aukeratuko dira. Onartzen diren eskabideen egileei beraien telefono mugikorreko SIM txartela aktibatzeko nora joan behar duten azalduko zaie, eta proba pilotuan parte hartzeagatik 20 bidaia kargatuko zaizkie dohainik, opari gisa.
Ekimena aitzindaria da Europan; izan ere, Europako bi hiri lotuko ditu eta Gijonen eta Donostian egingo da batera, aplikazio bakarrarekin Donostiako zein Gijongo hiri autobusetan bidaiatu ahal izango baita telefono mugikor berberarekin.
Proiektua SITE (Smart Travelling in Atlantic Cities) Europar Batzordearen ticketing ekimenaren baitan kokatzen da, Eskualdeen Garapenerako Europako Fondoak (FEDER) finantzatuta, non Dbus, EMTUSA Gijongo hiri garraiorako udal enpresarekin, Movistar telefoniako operadorearekin eta Telvent eta Oberthur konpainia teknologikoekin elkarlanean, hiri bat baino gehiagoren artean jarduteko moduko NFC ordainketa sistema bat garatzen ari baita.
Hasieran, Donostiako esperientzia Dbuseko hiri autobusetara mugatuko da, eta ondorengo faseetan beste operadoreetara zabaltzeko aukera aztertuko da. Edozein kasutan lortutako esperientzia erabilgarria izan daiteke Gipuzkoako Garraio Agintaritzarentzat, etorkizunera begira ordainketa sistema berriak aztertzeko.
Ekimen berri honekin nabarmentzen da Konpainiak hiri garraioaren irisgarritasuna eta erosotasuna handitzen lagunduko duten aurrerapen teknologikoen alde egiten duen apustua; izan ere, hala erakusten dute azken hilabeteetan egin dituen azken inplementazioek, esaterako autobusen iritsiera orduak kontsultatzeko QR kodeak eta billeteak baliozkotzeko autobusen erdiko ateetan jarritako makinak. Inplementazio horiei esker, Dbus finalera heldu ahal izan da munduan ospetsuak diren Transport Ticketing sarietan, Garraio Konpainia Berritzaileenen kategorian.
Honekin lotutako dokumentuak
1. Parte hartzeko eskaera orria
> Eskaera orria deskargatu (pdf)
2. Galdera ohikoenak
> Dokumentua deskargatu (pdf)
Dbus MasterCard Transport Ticketing sariaren bost finalisten artean dago, Garraio Enpresa Berritzaileenaren kategorian. Mundu mailan ospe handia duen aintzatespena da hori. Sariak garraio publikoko eragileen bikaintasuna azpimarratzen du, euren garraioaren berriztapenerako apustua azpimarratuz, garraio jasangarriago eta eraginkorrago baten alde.
Bost finalisten artean, Dbus ez ezik, gure aldean baliabide asko dituzten enpresa handiak daude eta, beraz, horrek Dbusen izendapena oraindik eta esanguratsuagoa egiten du.
Donostiako Tranbia Konpainia – Dbus enpresaren hautapena azken urteetan aurrera eramandako hainbat akziori esker lortu da, Konpainiak Donostian garraio publiko hobea lortzearren inplementatutako teknologia berriei esker. Inplementazio horiekDbus nazioartean erreferentzia gisa kokatu dute, bai eta hainbat aintzatespen eta sari lorrarazi ere.
Irabazleak Transport Ticketingeko Aholkularitza Kontseiluak aukeratuko ditu, garraioaren industriako profesionalek zuzenean emandako botoak kontuan hartuz. Urtarrilaren 27an, astelehenez, Londresen egingo den ekitaldian jakinaraziko dira irabazleen izenak.
Dbus Garraio Enpresa Berritzaileenaren kategorian aukeratu dute, eta Garraio Txartel Adimenduen kategorian, berriz, ATM Bartzelonako Garraio Metropolitanoaren Agintaritza aukeratu dute.
Duela gutxi Dbus Garraioaren Nazioarteko Foroak emandako “Garraioaren Lorpenak” izeneko sarirako ere izendatu zuten, Konpainiak lortutako garraio publikoaren autofinantzaketa maila handiagatik. Sari bi horiekin aitortu egiten zaio Dbusi egindako lana, eta munduko garraio sektoreko konpainia hoberenetakoen artean kokatzen da modu sendoan.
Dagoeneko ikusgai dago Dbuseko web orrian eta YouTube kanalean Carlos F. Daganzo, Berkeleyko Unibertsitateko Garraio Zientzien Katedratikoak, pasa den urriaren 9an Donostiako udalean eman zuen hitzaldia, osorik.
Modu honetan, denok ezagutu ahal izango ditugu XXI. mendeko hirien konfigurazio jasangarriaren arloan eman diren berrikuntzak. Carlos F. Daganzo irakaslea da mugikortasun jasangarriaren arloan mundu mailan dagoen ikertzaile garrantzitsuena.
Ehun lagun inguru hurbildu ziren pasa den urriaren 9an, asteazkena, Dbusek antolatuta Carlos F. Daganzo irakasleak, Berkeleyko (Kalifornia) Unibertsitateko Garraioaren Zientzietako Katedradunak, Donostiako Udaleko Bilkura Aretoan eman zuen hitzaldira.
Mugikortasun, ingurumen eta ingeniaritzaren alorretako profesionalek, eta Donostiako zein Donostia inguruko herritar ugarik ere, Bartzelona eta Yokohama hiriek, esaterako, konfigurazio eraginkorragoa eta iraunkorragoa izatea ahalbidetu duten azken berrikuntza teknologikoak zuzenean ezagutzeko aukera izan zuten.
Carlos F. Daganzo, jendeak dioenez mugikortasun iraunkorraren alorrean munduan dagoen ikertzailerik hoberena baita, hiriak modu razionalean konfiguratzeko premia transmititu zuen, hiri erdialdeetako trafiko fluxua optimizatzeko dauden azken aurrerapen teknologikoez baliatuta eta garraio kolektiboaren erabilera nabarmenduta XXI. mendeko hirietarako garraio modurik eraginkorren gisa.
Era berean, Daganzo irakasleak Dbuseko autobusetan berriki jarri duten Anti-Buching sistemaren gakoak azpimarratu zituen, Dbusekin eta Kaliforniako Berkeleyko Unibertsitatean sortutako Via Analytics enpresarekin batera aritu baita horretan. Sistemaren helburua da linea bereko autobusen artean zaindu beharreko distantziari eustea, ezarritako ordutegiak ahalik eta gehien errespetatzeko. Sistemak hobeto gidatzeko gida bisualak eskaintzen ditu, gidariaren postuaren ondoan jarritako Tablet baten bidez, eta jada 5, 25 eta 28 lineetako autobusetan eta hiriko hainbat lineatan dabilen autobus hibridoan instalatuta dago.
Dbusek autobusen iritsiera orduak denbora errealean kontsultatzeko QR kodeen bitartezko sistema berri bat jarri du erabiltzaileen esku. Kodeak gaur egun informazio panel elektronikorik ez duten geltokietan daude erabilgarri, eta kode horien bitartez internet konexioa duen telefono mugikorra dutenek kontsultatu ahal izango dute zenbat denbora falta den autobusa beraien geltokira heltzeko.
Gaur egun, internet konexioa duten telefono mugikor gehienek QR edo Bidi kodeak irakurtzeko aplikazio edo app bat ere izaten dute edo beraien aplikazio zerbitzurik jaitsi dezakete dohainik. Kodearen funtzionamendua oso erraza da. Aplikazioa aktibatu eta mugikorra kodearen aurrean jarri, argazki kamerarekin kodearen irudi osoa hartzeko, eta segundo batzuen ondoren erabiltzaileak geltoki horretara doazen linea guztietako autobusen iritsiera orduak ikusi ahal izango ditu Dbuseko mugikorretarako webgunearen bitartez. Kodea azkar irakurtzen da eta autobusen iritsiera orduen gaineko informazioa berehala eskuratzen da; horrek denak zerbitzua erosoa eta efizientea izatea egiten du.
QR kodeak hiriko geltokietan instalatuta, Dbusek autobusen iritsiera orduak kontsultatzeko dituen sistema ugariei beste bat gehitzen die, erabiltzaile mota guztietara egokituta. Gaur egun, Dbuseko autobusak erabiltzen dituzten pertsonek kontsultarako hainbat sistema dute, SMSak, mugikorretarako webgunea, geltoki askotan dauden informazio panel elektronikoak, Bluetooth sistema eta web orria, esaterako, eta orain horiei denei QR kodeak gehituko zaizkie.
Kontsultarako sistema berriak agerian uzten du Konpainiak pertsona guztiei lineen gainean eta autobusen iritsiera ordu eta denboren gainean informazio osotua eta eguneratua helarazteko hartu duen konpromisoa, hiritik mugitzeko garraio publikoa, garraio ekologikoa eta iraunkorra, eskuragarriago jarrita.
QR kodeak geltokietan inplementatzea SITE proiektuaren baitan (Smart Traveling in Atlantic Cities) garatutako ekimena da, garraio publikoaren gaineko informazioa eskuragarriago egiteko hobekuntza neurrietako bat, zehazki. Proiektua Eskualdeen Garapenerako Europako Fondoak (FEDER) finantzatuta dago, eta Dbusek Eremu Atlantikoko beste bost hirirekin batera parte hartzen du bertan garraio publikoa hobetzeko diren sistema teknologikoen ezarpena bultzatzeko asmoarekin.
Dbusek bere autobusen eraginkortasun energetikoa eta zerbitzuaren puntualtasuna hobetzeko sistema berritzailea instalatu du autobusetan. Donostian instalatu den sistema berriak EKObus izena dauka eta aitzindaria da munduan, lehenengo aldiz instalatu baita.
EKObusek, euskarri gisa, Tablet bat dauka gidariaren postuaren ondoan, zeinak, irudi bidezko kontsignen bitartez, modu iraunkorragoan eta ezarritako ordutegiak betez gidatzen laguntzen baitu. Gaur egun 5, 25 eta 28 lineetako autobusek dute instalatuta, baita hiriko hainbat lineatan dabilen autobus hibridoak ere. Gidatzea eta puntualtasuna optimizatzeko elkarren osagarriak diren bi sistema ditu:
1. Eraginkorrago gidatzeko laguntza sistema
Erregai kontsumoa murrizten eta eguratsera gas kutsatzaile gutxiago igortzen laguntzen duen sistema bat da. Ikono moduan bistaratzen diren kontsignei esker, sistemak gidatzeko modu egokia adierazten dio gidariari une bakoitzean, gidatzea bera hobeto egiteko, erregaia aurrezteko eta matxura gutxiago edukitzeko.
2. Anti-bunching sistema geltokietako ordutegiak hobeto betetzeko
Puntualtasuna hobetzeko sistemari esker, linea bereko autobusen artean egon beharreko tarteari eutsi ahal zaio, linearako ezarritako maiztasuna ahalik eta gehien errespetatzeko. Hala, semaforo baten antzera dabilen sistema baten bitartez, gidariari abiadura moteldu edo azkartu behar duen adierazi egiten zaio, bai eta maiztasunari eusteko geltokian eman beharreko denbora zehatza eta geltokitik irteteko une zehatza ere.
Sistema biak elkartu egin dira gidariari informazioa sistema bakarraren bidez emateko, bide batez gidariaren postuaren ergonomia hobetuta. Sistema berri honen inplementazioak erregai gehiago aurreztea eta zerbitzuak puntualagoak izatea espero da, gidariei zein erabiltzaileei eta hiritar guztiei on eginez.
Irizar Taldekoa den Datik enpresa teknologikoak eta Berkeleyko Unibertsitateak (Kalifornia) sortutako VIA Analyitics enpresak elkarrekin garatu dute EKObus sistema. Sistemaren garapenerako Carlos F. Daganzo Berkeleyko Unibertsitateko Garraioaren Zientziaren katedradunaren eta ikertzailearen laguntza eduki da.
Sistema hainbat hilabete ari da martxan Dbuseko autobus batzuetan, eta ATUC Hiri Garraio Kolektiboen enpresa kudeatzaileen Elkarteak, Dbusen presidentea izanik eta Teknologia Berriak, Kalitatea eta Marketina Batzordearen bitartez, urriaren 9 eta 10erako Donostian antolatu duen jardunaldian aurkeztuko da. Jardunaldian hainbat hiritako garraio enpresen ordezkariak izango dira.
EKObus ekimena batez ere ibilgailuen eraginkortasun energetikoa lantzen duen SmartCem proiektuaren baitan sartzen da, eta bertan Dbusek eta Donostiak beste hiri batzuekin elkarlanean dihardute, esaterako Bartzelonarekin, Turinekin eta Newcastlerekin. SITE proiektuaren baitan ere kokatzen da, eta proiektu horretan Dbusek Eremu Atlantikoko beste bost hirirekin dihardu garraio publikoa hobetuko duten sistema teknologikoen inplementazioa bultzatzeko.
Urriaren 2an, asteazkenean, Dbusek Metrobus Mexiko Hiriko garraio publikoko konpainia nagusietakoaren zuzendaritzatik bisitan etorritakoak hartu zituen bere instalazioetan.
Metrobus Bus Rapid Transit (BRT) sisteman oinarritutako garraio modua da, 380 autobus ditu, horietatik 320, 18 metroko artikulatuak eta 25 metroko biartikulatuak direlarik, eta egunean 800.000 erabiltzaile baino gehiago garraiatzen ditu. Metrobus Latinoamerikako erreferente nagusietakoa da bere flotaren efizientzia eta zerbitzuaren kalitatea direla-eta. Sistemaren emaitza onei esker, datozen 5 urteetan flota bikoiztu egingo dutela aurreikusten da.
Hiriko BRT sistema (Bus Rapid Transit), funtsean, garraiorako bide esklusiboak eta erreserbatutako plataformak dituen sistema da, konexio eraginkorra eta erabiltzaileari denbora errealean informazioa emateko sistema bikaina eskaintzen duena, bai eta zerbitzua modu optimizatuan planifikatzeko aukera ere. Dbusek gaur egun bere bi lineatan dauka BRT sistema, talde-garraioko sistema berriztatzaile eta adimenduna, 5 Benta-Berri eta 28 Amara-Ospitaleak lineetan, zehazki. Horri esker, hiriari 10.5 milioi euro aurrezten dizkio urtero istripu, zarata eta kutsaduraren gutxitzeari esker, baita pilaketen gutxitzeari esker ere. Honen emaitza positiboak direla eta, duela gutxi Dbusek Garraioaren Nazioarteko Foroaren saria eskuratu zuen.
Bisitan, Mexikoko ordezkariek Dbuseko instalazioak ezagutu ahal izan zituzten, bai eta tailerrak eta autobusen kontrolerako zentroa ere, eta egiaztatu ahal izan zuten, halaber, Dbuseko autobusetan instalatu diren azken aurrerapen teknologikoak, esaterako itsuentzako audio bidezko informazio sistemak eta billeteak baliozkotzeko makina berriak, azkarragoak eta eraginkorragoak. Era berean, hurbiletik egiaztatu ahal izan zuten autobusen erabilera, efizientzia eta segurtasuna hobetzeko Dbusek dituen kontrol eta kudeaketa sistemen funtzionamendua.
Dbusen oso garrantzitsutzat jotzen dugu nazioarte mailan hiriarteko garraioaren hobekuntzan lanean ari diren erakundeekin harremanetan egotea, kanpoko esperientzietatik ikasteko aukera ematen duelako eta etorkizuneko ikuspegi berri bat ere bai, lankidetza berriak eta baterako proiektuak sortzeko aukerak irekitzeaz aparte.