Berriak

Dbusek Volvo markako 12 metroko autobus % 100 elektrikoa probatuko du

Datozen bi asteetan, Dbusek Volvo markako 12 metroko autobus %100 elektrikoa eta zero emisiokoa probatuko du. Autobusa zirkulatzen ari da jada Donostiako kaleetan. Benetako zerbitzua ematen ari da bidaiariekin, eta ziur aski uztailaren 3ra arte emango du zerbitzua, 16-Igeldo linean, larunbat, igande eta jaiegunetan, eta 25-Benta Berri-Añorga linean, lanegunetan.

Azken belaunaldiko Volvo 7900e modeloa da, 470kWh-ko ahalmena duten eta gauean Kotxetegietan kargatzekoak diren bost bateria dituena. Era berean, kamera bidezko atzerako ispilu digitalak ditu, eta besaulkien eta argiztapenaren diseinu berritzailea barruan. Une honetan, modelo horretako 640 unitate baino gehiago daude Europako hainbat hiritan zerbitzua ematen.

Proba hau da Dbusen flota elektrifikatzeko prozesuaren aurreko fasean autobus elektrikoekin egiten ari diren frogetako bat. Izan ere, Next Generation funtsen bidez laguntzak eskatu zaizkio MITMAri (Garraio, Mugikortasun eta Hiri Agenda Ministerioa) 19 autobus %100 elektriko erosteko (4.160.000€-ko dirulaguntza jasoko da) eta Industria, Merkataritza eta Turismo Ministerioari ere beste autobus elektriko bat gehiago erosteko (550.000€-ko dirulaguntza jasoko da), eta dirulaguntza horiei esker egiten ari dira froga horiek.

•
24 Ekaina, 2022
By Esti
In Berriak, Berriak home, Next funtsak

Irakurri

Red.es erakundeak 5G Euskadi proiektuaren erabilera kasuak bisitatu ditu Donostian

Atzo, Ekonomia Gaietako eta Eraldaketa Digitaleko Ministerioaren Red-es erakundea bisitan egon zen Donostia – San Sebastianen, eta 5G Euskadi proiektuaren barruan hirian garatzen ari diren erabilera kasuak ezagutu ahal izan zituen.

5G Euskadi proiektua 19 enpresa eta erakunde publiko eta pribaturen baterako ekimen bat da, hiru parke teknologikoetan benetako 5G sare bat zabaltzeko eta gaitzeko helburuarekin abiarazia, baita 9 erabilera kasu gauzatzeko ere, mugikortasunaren, energiaren, industriaren, zibersegurtasunaren eta Sareko zerbitzuen arloetan produktuak eta zerbitzuak merkaturatu aurretik garatzeko.

Zehazki, Miramongo parke teknologikoan, parke teknologikoa bera hartzen duen eta hiriko ospitaleen eremuraino hedatzen den estaldura eremuaren barruan, gauzatzen ari diren mugikortasuneko 3 kasuak bisitatu dira. Estaldura hau Dbusen bi linearen espazio bat eta esperimentaziorako ekipatu diren eta espazio horretan ere mugituko diren ibilgailuak estaltzeko diseinatuta dago.

Hala, bisitan zehar, Red-es erakundearen ordezkariak Dbus Donostiako hiriko autobus garraioko enpresaren instalazioetara hurbildu ziren. Izan ere, proiektuaren barruan, enpresak 28-Amara-Ospitaleak lineako autobusetan ezarri du 5G teknologia, linea hori baita Euskadin erabiltzaile gehien erregistratzen duen hiriko autobus linea. Zehazki, autobus barruan doazen erabiltzaileei eskaintzen zaien wifi konexioa hobetzeko zein autobusetako bideozaintza sistema hobetzeko erabili da teknologia hori. Ordezkaritzak sistema horien funtzionamendua egiaztatu ahal izan du zirkulazioan dagoen autobus batean, 28 linearen ibilbidea eginda, Miramongo Parke Teknologikoraino. Gero, proiektuko gainerako erabilera kasuak ezagutzen jarraitu zuten.

5G Euskadi proiektua saiakuntza banku bikaina da 5G teknologiak bidaiarien entretenimendurako zein publizitatearen zabalkunderako multimediako edukiak kudeatzeko eta banatzeko eskaintzen dituen onurak erakusteko, eta horren xehetasunak ezagutzeko, Dbus bisitatu ondoren Red.es erakundeak Ceiten instalazioak bisitatu zituen.

Pilotuak ematen dituen sare gaitasun berriak ebaluatzeko, Ceiten CCT tresna sorta (Channel Characterization Tool) erabiltzen ari da. Tresna horri esker, Dbusen 28 linearen ibilbideko puntu bakoitzean 5G lotunea karakterizatu ahal izan da. Tresna horrekin, ikusi da, adibidez, Donostiako erdialdean batez beste 200 Mbp-ko banda zabalera lortzen dela jaitsieran, 500 Mbps baino gehiagoko goreneko mailekin.

Vicomtechek, berriz, partzuergoari auto konektatu bat gaitu dio, CAFekin, Ikusirekin eta Ceitekin batera. Bisitariek 5G eta komunikazioen laborategia ikusi ahal izan zuten, baita hainbat sentsore dituen eta 5G konektibitatea ontziratuta duen auto bat ere, zeinak aukera berriak irekitzen dituen mantentze prediktiboko funtzioetarako, operadoreak MECen bidez emandako konputazio zerbitzuetan algoritmiak inplementatuz. Erakustaldi horren inguruan, Ikusik trenetarako duen ekipamendu ontziratua erakutsi zuen, bai eta pilotu honetan garatutako aplikazioa ere. Aplikazioan, batetik, 4G eta 5G teknologiak erabiliz transmititutako datuen latentziak konparatu dira, eta ikusi da 5G teknologiak 10 minutu inguruko latentzia hobea eskaintzen duela, eta, bestetik, prozesatze ahalmenaren gaineko test bat egin da, zeina MECera deskargatu baitaiteke, eta emaitza izan da MECek gutxi gorabehera bikoiztu dezakeela ontziratutako ekipoaren prozesatze ahalmena, baita hirukoiztu ere. Vicomtechek, halaber, MECen hedatutako multimedia edukien banaketa monitorizatzeko duen tresna erakutsi du. Tresnak esperientziaren kalitatea hobetzea ahalbidetzen du, MECek multimedia edukia biltegiratzeko (Edge Caching) eta eduki hori erabiltzaileei banatzeko dituen gaitasunak aprobetxatuz.

Eguna amaitzeko, Pilar Arana Mugikortasun eta Garraio zinegotziak harrera egin zion ordezkaritzari, Donostiako Udaletxean.

Azpimarratu behar da Espainian dagoen 5G pilotu bakarra dela, eta bertan hiru operadorek parte hartzen dutela (Euskaltel Taldea, MASMOVIL eta Orange), soluzioen eta erabilera kasuen gaitzaile teknologiko gisa. ZTE teknologia enpresa, bere aldetik, 5G sareko ekipoak hornitzeaz arduratu da. Multioperadore izaera hori izan da enpresetako ordezkariek balioan jarritako indarguneetako eta bereizgarrietako bat.

5G Euskadi proiektuari buruz

5G Euskadi proiektua 19 enpresa eta erakunde publiko eta pribaturen baterako ekimen bat da, hiru parke teknologikoetan benetako 5G sare bat zabaltzeko eta gaitzeko helburuarekin abiarazia, baita 9 erabilera kasu gauzatzeko ere, mugikortasunaren, energiaren, industriaren, zibersegurtasunaren eta Sareko zerbitzuen arloetan produktuak eta zerbitzuak merkaturatu aurretik garatzeko.

2020an hasi zen proiektua, eta 5G teknologiako proiektu pilotuen bigarren deialdiaren barruan sartzen da. Deialdia Red.es erakundeak sustatu du, 5G Plan Nazionalaren eta Ekonomia Gaietako eta Eraldaketa Digitaleko Ministerioaren Lurralde Adimendunen Plan Nazionalaren barruan. Proiektuak 30 hilabeteko iraupena du eta 7,1 milioi euroko inbertsioa eskatzen du. Inbertsio horretarako, Red.es erakundeak 2,2 milioiko dirulaguntza eman du, Eskualde Garapeneko Europako Funtsaren bidez (EGEF) kofinantzatuta, Espainiako Eskualde anitzeko Programa Operatiboaren kontura (POPE).

Hori garatu ahal izateko, enpresa, berrikuntza zentro eta erakunde publikoen ekosistema bat sortu da, eta proiektu hau baterako erronka bat da horientzat denentzat. Batetik, ABEEko bazkideak: CAF, CEIT-Zentro Teknologikoen Elkartea, Dbus, Datik, Euskaltel, Gestamp Servicios, IKUSI, MASMOVIL, ORANGE, R Cable, Vicomtech eta ZTE. Bestetik, hainbat kolaboratzaile, hala nola Basque Cybersecurity Centre (BCSC), Tecnalia Research&Innovation Fundazioa, Gestamp Bizkaia, Iberdrola, Tecnum, Nafarroako Unibertsitatea edo Euskal Herriko Unibertsitatea.

Eta, gainera, proiektuak laguntza instituzional garrantzitsua du; izan ere, erakunde hauen laguntza ere badu: Red.es eta Estatuko Idazkaritza, Eusko Jaurlaritza, eta Donostiako Udala Donostiaren Sustapenerako Sozietate Publikoaren bitartez, bai eta Euskadiko Parke Teknologikoen Sarea ere.

Informazio gehiago hemen:https://5g-euskadi.com/

•
23 Ekaina, 2022
By Esti
In Berriak

Irakurri

Dbusek bat egiten du Dravet Sindromearen inguruko kontzientziazioa bultzatzeko Nazioarteko Egunarekin

Ekainaren 23an, ostegunean, Dravet Sindromearen Inguruko Kontzientziazioa Bultzatzeko Nazioarteko Eguna ospatzen da.

Dravet Sindromea edo Haurtzaroko Epilepsia Miokloniko Zorrotza 4 eta 12 hilabeteko haurrengan agertzen da lehen aldiz, eta konbultsio kloniko edo toniko-kloniko orokor edo aldebakarrekin lotua dago. Orokorrean iraupen luzekoak dira konbultsioak, sukarrarekin edo gabe. Azken ikerketen arabera, gaixotasun honek 20.000 jaiotzetik 1i eragiten dio.

Dbusek bat egiten du Dravet Sindromea ezagutarazteko eta gaixotasun honen aurka lanean dihardutenei babesa emateko tokiko plataformak egiten dituen ekintzei. Horregatik, bihar Donostiako hiri autobus guztiek Dravet Sindromearen kartela eramango dute egun guztian zehar.

•
22 Ekaina, 2022
By Esti
In Berriak, Jarduerak

Irakurri

Ekainaren 23tik aurrera Dbusek zerbitzu gehiago emango ditu udan

Ekainaren 23an, ostegunean, San Juan bezperan, Dbuseko udako zerbitzuak hasiko dira, eta abuztuaren 31ra arte, asteazkena, eskainiko dira. Udan, halaber, Dbusek zerbitzu bereziak eskainiko ditu denboraldiko ekitaldirik garrantzitsuenetarako.

Informazioa ikusi (pdf)

•
20 Ekaina, 2022
By Esti
In 46 eu, B1 eu, B10 eu, B2 eu, B3 eu, B4 eu, B5 eu, B6 eu, B7 eu, B8 eu, B9 eu, Berriak, Berriak home, Linea 05 eu, Linea 08 eu, Linea 09 eu, Linea 13 eu, Linea 14 eu, Linea 16 eu, Linea 17 eu, Linea 18 eu, Linea 19 eu, Linea 21 eu, Linea 23 eu, Linea 24 eu, Linea 25 eu, Linea 26 eu, Linea 27 eu, Linea 28 eu, Linea 29 eu, Linea 31 eu, Linea 32 eu, Linea 33 eu, Linea 35 eu, Linea 36 eu, Linea 37 eu, Linea 38 eu, Linea 39 eu, Linea 40 eu, Linea 41 eu, Linea 42 eu, Linea 43 eu, Linea 45 eu, Linea TB6

Irakurri

Dbus-ek autobusetako makina balioztatzaileak berrituko ditu, Next Generation funtsen bidez

DTK-k lizitaziora atera du Dbusen autobusetako makina balioztatzaileak berritzeko lana. Zehazki, 310 unitate berrituko dira. Autobusetan aurre ezkerraldean eta erdialdean dauden makina guztiak dira horiek. Izan ere, gidariaren postuaren ondoan dauden txartel makinak berriki eguneratu dira. Horrela, Dbusen autobus guztietan ordainketa makina guztiek gidatzeko postuaren ondoko makinek dituzten funtzionalitate berritzaile berberak izango dituzte.

Kontratuaren barruan, makinak instalatu, abian jarri eta mantentzeko lanak sartzen dira. Garapena eta martxan jartzea Europar Batasunaren Suspertze eta Erresilientzia Funtsak (Next Generation Funtsak) finantzatutako jardueretan sartzen dira, udalerriei igorpen txikiko eremuak ezartzen eta garraioaren eraldaketa digital eta iraunkorra egiten laguntzeko Garraio, Mugikortasun eta Hiri Agenda Ministerioak (MITMA) duen laguntza programaren barruan.

Berritzeko epea 52 astekoa da, kontratua sinatzen denetik, eta kontratuaren balio zenbatetsia 1.088.892 eurokoa da (BEZik gabe). Diru kopuru horretatik, 662.742 € Next Generation funtsekin finantzatuko dira. Esleipena udazkenean egin ahal izatea aurreikusten da.

Makina berrien funtzionalitateak

Makina berriek era guztietako sistemekin ordaintzeko aukera emango dute: MUGI txartelak, BAT eta BARIK txartelak, San Sebastian Card eta Basque Card turista txartelak, EMV kontakturik gabeko banku txartelak, baita Dbusen laster ezarriko den QR kodeen sistema ere. Horrela, autobuseko makina guztiek funtzionalitate berberak eskainiko dituzte, eta erabiltzaileek ordaintzeko modu gehiago eta bidaia esperientzia hobea edukiko dute.

•
17 Ekaina, 2022
By Esti
In Berriak, Next funtsak

Irakurri

Grupo Avanzaren ordezkaritza bat Dbusen, bisitan

Gaur, Dbusek Grupo Avanzaren ordezkaritza baten bisita jaso du bere instalazioetan. Errepide bidezko bidaiarien garraio sektoreko operadore nagusietako bat da Grupo Avanza. Ordezkaritzako lagunek Kotxetegien instalazioak bisitatu ahal izan dituzte, eta Donostiako autobusen flotan ezarritako azken aurrerapen teknologikoak zehaztasunez ezagutu.

Bisitan zehar, SAE ustiapenerako laguntza sistemaren funtzionamendua egiaztatu ahal izan dute, bai eta Dbusen ticketing sistemaren funtzionamendua ere, bereziki EMV kontakturik gabeko banku txartelaren bidez ordaintzeko Dbusen autobus linea guztietan instalatuta dagoen sistema. Sistema berritzaile horri esker, kontakturik gabeko Visa, Mastercard eta American Express kreditu txartelekin eta zordunketa txartelekin eta mugikorretako aplikazio batzuekin ordaindu daitezke noizbehinkako bidai txartelak. Gidatzen laguntzeko EKObus sistema ere ezagutu dute. Sistema aitzindari hori ere Donostiako flota osoan dago erabilgarri. Eraginkortasunez gidatzen laguntzeko sistema batez eta anti-bunching sistema batez (autobusek bat ez egiteko sistema) osatuta dago. Gidariari laguntzen dio era ekonomikoan eta ekologikoan gidatu dezan, erregai fosilen kontsumoa eta kutsatzaileen igorpena gutxituta eta, aldi berean, linearen maiztasuna eta puntualtasuna mantenduta. Euskal Eurohirian garraio publikoa sustatzea helburu duen E-MOBASK proiektu europarraren barruan sartzen dira sistema biak.

Sistema horiekin batera, ordezkaritzak geltokiak sentsorizatzeko sistema ere ezagutu du, geltokian dauden erabiltzaileen kontaketaren ia kontrol zehatza egiteko aukera ematen duena, eskaera aurreikustea ahalbidetuta. Ildo horretan, big datatik abiatuta Konpainiaren autobusetan bidaiatzen dutenen jatorria-helmuga matrizea eraiki dezakeen programa berritzaile bat ere badu. Autobusetako ticketing datuetatik abiatuta eta algoritmo matematiko bat erabiliz, erabiltzaileek egin ohi dituzten bidaiak osatu ditzake. Hau da, erabiltzaileek egin ohi dituzten bidaien erregistroa hartuz jakin daiteke zer geltokitan igotzen eta jaisten diren erabiltzaile horiek, haien jatorri-helmuga matrizea, alegia.

Ordezkaritza harrituta geratu da Donostiako hiriko BRTaren (Bus Rapid Transit) operatibarekin. Bus sistema hori, funtsean, garraiorako bide esklusiboak eta erreserbatutako plataformak dituen sistema bat da, konexio eraginkorra eta erabiltzaileari denbora errealean informazioa emateko sistema bikaina eta zerbitzuan modu optimizatuan planifikatzeko aukera eskaintzen dituena. Gaur egun Dbusek BRT sistema dauka bere bi lineatan, zehazki 5-Benta Berri eta 28-Amara-Ospitaleak lineetan. Garraio kolektiborako sistema berritzailea eta adimenduna da, eta Dbuseko autobus sareko gainerako autobusekin bikain integratuta dago.

Hitz batean, kontua izango da zerbitzuak modu eraginkorragoan antolatzea eta planifikatzea sistema hobetzeko eta erabiltzaileen premietarako egokia den garraio publiko bat eskaintzeko.

Dbusen oso garrantzitsutzat jotzen dugu nazioarte mailan hiriko garraioaren hobekuntzan lanean ari diren enpresa eta erakundeekin harremanetan egotea, bere testuinguru partikularreko premietan zentratuta baina ikuspegi globalarekin, izan ere, kanpoko esperientzietatik ikasteko aukera ematen du eta etorkizuneko ikuspegi berri bat ere bai, lankidetza berriak eta baterako proiektuak sortzeko aukerak irekitzeaz gain.

•
31 Maiatza, 2022
By Esti
In Berriak, Berriak home

Irakurri

Next Generation funtsek onartutako laguntza eskaeren lehen lizitazio orriak argitaratu ditu DTK-k

DTK-k Flota elektrifikatzeko kotxetegien azpiegitura elektrikoan egin beharreko eraberritze lanak egiteko eta Dbuseko flotarako 19 autobus %100 elektriko erosteko lizitazio orriak argitaratu ditu Europar Batasuneko Aldizkari Ofizialean (EBAO). Emisio gutxiko guneak ezartzeko eta hiri garraioaren eta mugikortasunaren eraldaketa digitala eta iraunkorra egiteko Garraio, Mugikortasun eta Ingurumeneko Ministerioak onartutako proiektuak dira.

Lizitazio orriak, halaber, Illunbeko disuasio aparkalekuaren eta hiriaren erdigunearen artean ibiliko den 12 metroko autobus lantzadera elektrikoa erosteko izango dira. Helmugetako Jasangarritasun Turistikoaren ezohiko deialdiaren barruan aurkeztu eta Industria, Merkataritza eta Turismo Ministerioak onartutako proiektua da.

Ministerio bien dirulaguntzak Europako Next Generation funtsen baliabideekin finantzatuta daude.

Lizitazio horien helburua da, lehenengo, Kotxetegien eraikin nagusiko autobus plazak eta ibilgailu mota guztiak (12 metrokoak, artikulatuak, mikrobusak, furgonetak eta autoak) elektrifikatzea ahalbidetuko duen azpiegitura elektriko bat edukitzea, 119 plaza elektrifikatu edukitzeko aukerarekin. Plaza horiek hauek lirateke: 26 autobus artikulatu, 12 metroko 88 autobus, eta 5 mikrobus, zerbitzuko furgonetetarako 6 plaza elektrifikatuez gain. Eta bigarrenik, 20 autobus %100 elektriko martxan jartzea, horiekin urtero eguratsera 1.800 tona CO2 gutxiago igortzea saihestuta.

Bi jarduketek 17.711.000 euroko aurrekontua dute guztira (BEZa sartu gabe), honela xehakatuta:

Proiektua idatzi, obra egin eta karga ekipamendua hornitu eta muntatzeko zerbitzuak, harik eta kotxetegiak elektrifikatzeko azpiegitura erabat martxan jarri arte: 5.211.000 euro.
12 eta 18 metroko hiri autobus %100 elektrikoen hornidura kontratatzea, loteka: 12.500.000 euro.

2 proiektuak gauzatzeko, DTK-k 7.748.800 euroko dirulaguntza jasoko du bi Ministerioetatik.

Aurreikusten da kontratuak 2022aren bigarren seihilekoan esleitu ahal izatea eta autobus elektrikoen lehenengo entregak 2023tik aurrera gauzatzea.

•
31 Maiatza, 2022
By Esti
In Berriak, Berriak home, Next funtsak

Irakurri

Dbizik Aenorren ziurtagiria lortu du UNE-EN 13816 Arauaren arabera, zeinak bere zerbitzuaren kalitatea bermatzen duen

Donostiako bizikleta alokairu sistemak, Dbizik, AENORen ziurtagiria lortu du, Garraio Publikoaren Kalitatea Kudeatzeko Sistemaren gaineko UNE-EN 13816 arauaren arabera, zeinak bere zerbitzuaren kalitatea aitortzen duen. Bizikleta alokatzeko enpresetatik arau honen arabera AENORen ziurtagiria eskuratu duen lehena eta bakarra da. Gaur eman zaio ziurtagiria Donostiako Udaletxean, eta ekitaldian parte hartu dute hiriko Mugikortasun eta Garraio zinegotzi Pilar Aranak, Dbuseko zuzendari gerente Igor Gonzalezek, BIZISS ABEEko gerente Jesús Sánchezek eta AENORen Euskadiko zuzendari Gonzalo San Antoniok.

Dbizi 2020ko abenduan jarri zen martxan, eta urte eta erdi eskasean zifra errekorrak lortu ditu, erabiltzaile kopuruari eta egindako bidaiei dagokienez. 2022ko lehen lauhilekoan modu ikusgarrian eta etengabean hazten jarraitu du, eta 196.790 bidaia egin ditu. 2021ean, berriz, 113.445 bidaia erregistratu ziren denbora tarte berean. Abonatuei dagokienez, 2022ko lehen lauhileko honetan Dbizik 6.431 erabiltzaile ditu, 2021eko aldi bereko 3.901 abonatuen aldean. Gainera, bizikletak alokatzeko hiriak aurretik izandako sistemarekin erregistratu ziren kopuruak baino askoz handiagoak dira.

BIZISS ABEEak (MOVUSek eta URBASERek eratutako ABEEa) kudeatzen du Dbizi sistema, Dbusen eta Donostiako Udalaren bitartez. AENORen ziurtagiri berri horretaz gain, BIZISS ABEEak kalitatea kudeatzeko ISO 9001 Arauaren araberako ziurtagiria du.

Erabiltzaileen gogobetetzea

Ziurtagiri horren esparruan, Dbizik gogobetetze inkesta bat egin die erabiltzaileei, eta emaitza oso onak eman ditu; izan ere, erabiltzaileek baieztatu dute zerbitzuak ondo funtzionatzen duela eta aitortu dute pandemiaren gorabeherak baldintzatutako urte honetan ahalegina egin dela. Datu horiek hiriko auzoetan bizi diren 16 urtetik gorako eta genero desberdineko 252 erabiltzaileri egindako inkesten bidez lortu dira. Inkestatuek zerbitzuaren hainbat alderdiri (irisgarritasuna, informazioa, erosotasuna, segurtasuna edo ingurumeneko eragina) ematen dieten garrantzia baloratu behar izan zuten, baita alderdi horietako bakoitzarekin zenbateraino dauden pozik adierazi ere. Lehentasun ordenaren arabera, hauek izan dira ondoen baloratutako alderdiak:

Bizikleta eta ainguraleku libreen eskuragarritasuna geltokietan.
Bizikletek eskaintzen duten segurtasuna.
Bizikletak garbi aurkitzea.
Matxuratutako bizikletak aldizkakotasun egokiarekin (24 h) ordezkatzea.
Egindako erreklamazioei erantzuteko azkartasuna.
Sisteman alta emateko sarbidea erraza izatea.
Bizikleten alokairu zerbitzuaren abonu motei buruz webgunean dagoen informazioa egokia izatea.
Bizikletak erabili ahal izatea, gehiago kutsatzen duten beste garraiobide batzuk erabili ordez.

Zerbitzua zabaltzea

2020an zerbitzua martxan jarri zenean aurkeztu zen bezala, Dbizi sistema zabaltzeko lanean ari da, geltoki gehiago eta bizikleta gehiago jarriz. Etengabe hobetzeko ildo horretan, datorren udazkenean Herreran bizikletetarako beste geltoki bat jartzea aurreikusita dago. Geltoki mistoa izango da, bizikleta elektriko eta mekanikoekin.

Bizikletaren erabilera bultzatzea Donostian

Dbizi sistema berria hiriaren mugikortasun iraunkorraren alde apustu handia egitea izan da. Datozen egunetan, Bizikletaren Aldeko Hirien Sareak bisita tekniko bat egingo du Donostian, eta sistema berria ezagutuko du. Espainiako 1.000 udalerri inguru ordezkatzen dituzten 140 erakundek osatutako elkartea da, eta Donostiako Mugikortasun eta Garraio zinegotzi Pilar Arana bizikletaren enbaxadore izendatu du aurten.

•
25 Maiatza, 2022
By Esti
In Berriak, Berriak home

Irakurri

Dbusek E-MOBASK proiektuaren amaierako ekitaldian parte hartu du

Gaur, E-MOBASK proiektu europarrari amaiera emateko mintegia egin da Hendaian. Proiektua 2018ko urtarrilean hasi zen eta bere helburua da Euskal Eurohirian garraio publikoaren erabilera bultzatzea eta laguntzea, ibilgailu pribatuaren aldean errazagoa, erakargarriagoa eta iraunkorragoa izan dadin eta ibilgailu pribatua baino gehiago erabiltzea bultzatzeko. Dbusek Gipuzkoako Garraioaren Lurralde Agintaritzarekin eta Ipar Euskal Herri – Aturriko mugikortasunen Sindikatuarekin batera parte hartzen du proiektu honetan, eta hiru ardatz nagusi ditu: informazioa hobetzea, ticketing integratua eta ordaintzeko modu berriak eskaintzea, eta garraio publikoaren elektromugikortasuna eta energia eraginkortasuna sustatzea. Aurkezpena azken lau urteetan garatutako mugaz gaindiko beste proiektu batekin batera egin da, SMARTMOB proiektuarekin.

Mintegian, proiektuaren esparruan Donostian egin diren berrikuntzak aurkeztu ditu Dbusek. Berrikuntza horietako bat da Dbusen linea guztietan EMV kontakturik gabeko banku txartelekin ordaintzeko aukera ezartzea, zeinarekin noizbehinkako bidai txartelak eta gaueko bidai txartelak banku erakunde desberdinen EMV kontakturik gabeko Visa, Mastercard eta American Express kreditu txartel eta zordunketa txartelekin eta mugikorretako aplikazio batzuekin ordaindu ahal izango diren. Era berean, lanean jarraitzen da datozen asteetan noizbehinkako txartelaren ordainketa QR kodearekin ere egin ahal izateko.

EKObus sistema Dbusen autobus flota osora zabaltzea da ezarri den beste neurri bat. EKObus sistema munduan aitzindaria da, autobusek bat egin ez dezaten eta eraginkortasunez gidatzeko sistema bat da. 2013az geroztik, Dbusek 32 autobusetan zuen sistema hori, eta E-MOBASK Europako proiektuari esker, flota osoan ezarri ahal izan da, lineen puntualtasuna hobetuta eta kontsumoak eta emisioak oro har murriztuta. Era berean, ordutegiak betetzen ere laguntzen dio gidariari, linearen maiztasuna mantentzen saiatzeko.

E-MOBASKek, halaber, hiri garraioa kudeatzen duten mugaz gaindiko erakunde bien arteko lankidetza iraunkorra ezartzea ahalbidetzen du, beren ibilgailuen floten trantsizio energetikoari batera ekiteko eta mugaz gaindi beren inpaktua optimizatzeko. Horretarako, bai Dbusek bai Ipar Euskal Herri – Aturriko mugikortasunen Sindikatuak beren 12 eta 18 metroko autobus %100 elektrikoen funtzionamenduari buruzko azterketak egin dituzte, eta bi flotak konparatzeko analisia ere egin dute.

Efizientzia energetikoa hobetzeko ildo honetan, Dbusek eguzki energiaz elikatzen diren bi informazio panel instalatu ditu autobus geltokietan. Donostian teknologia horrekin funtzionatzen duten lehen bi panel elektronikoak dira. Panel horiek autobusen geltokietako iritsiera orduak ematen dituzte, bai eta erabiltzaileentzat interesgarriak diren beste ohar batzuk ere. Hirian instalatuta dauden gainerako panelen aldean, panel berriek elikatze sistema alternatibo eta berriztagarria erabiltzen dute, markesinen goiko aldean jarritako eguzki plaken bitartez elikatzen baitira.

Informazioaren hobekuntzari dagokionez, hiru erakundeak material komunikatiboak lantzen aritu dira elkarrekin, eta mugaz gaindiko bidaiari hirueledunaren gida bat argitaratu da, lurraldeko biztanleek eta bisitariek Euskal Eurohirian dauden mugaz gaindiko mugikortasunerako irtenbide guztiak ezagutzeko aukera izan dezaten.

Azkenik, datozen hilabeteetan ticketing sistemen interoperabilitatea eta integrazioa aurreikusita dago, Ipar Euskal Herri – Aturriko mugikortasunen Sindikatuak kudeatzen duen garraioaren erabiltzaileek Dbusen Txik-Txak garraio txartelarekin bidaiatu ahal izan dezaten, eta, era berean, MUGI txartela duten erabiltzaileek Ipar Euskal Herriko garraiobideetan bidaiatu ahal izan dezaten, aurrerago Ipar Euskal Herriko erabiltzaileek ere Txik-Txak txartelarekin MUGI sistemaren sare osoan bidaiatzeko aukera izan dezaten.

E-MOBASK proiektua

E-MOBASK proiektua Eskualdeen Garapenerako Europako Fondoak (FEDER) kofinantzatu du %65ean, Interreg V-A Espainia-Frantzia-Andorra programaren bitartez (POCTEFA 2014-2020). POCTEFAren helburua da Espainia, Frantzia eta Andorra arteko mugako eskualdearen integrazio ekonomikoa eta soziala indartzea. Batez ere mugaz gaindiko jarduera ekonomikoak, sozialak eta ingurumenekoak garatzen laguntzen du, lurralde garapen iraunkorraren aldeko estrategia bateratuen bitartez.

•
23 Maiatza, 2022
By Esti
In Berriak, Berriak home, Jarduerak

Irakurri

Alsa Marruecos-en ordezkaritza bat Dbusen, bisitan

Gaur, Dbusek bisitan etorritako Alsa Marruecos enpresaren ordezkaritza bat hartu du bere instalazioetan. Marokoko sei hiri hauetan jarduten du Alsa Marruecos enpresak: Marrakex, Rabat, Casablanca, Tanger, Agadir eta Khourigba. Ordezkaritzako lagunek, Dbusen hainbat sistema teknologiko garatu dituen Indra enpresa teknologikoak operadore horretan ere parte hartu baitu, Kotxetegien instalazioak ezagutu ahal izan dituzte, baita Donostiako autobus flotan instalatutako azken aurrerapenak xehetasunez egiaztatu ere.

Bisitan zehar, SAE ustiapenerako laguntza sistemaren funtzionamendua egiaztatu ahal izan dute, bai eta Dbusen ticketing sistemaren funtzionamendua ere, bereziki EMV kontakturik gabeko banku txartelaren bidez ordaintzeko Dbusen autobus linea guztietan instalatuta dagoen sistema. Sistema berritzaile horri esker, kontakturik gabeko Visa, Mastercard eta American Express kreditu txartelekin eta zordunketa txartelekin eta mugikorretako aplikazio batzuekin ordaindu daitezke noizbehinkako bidai txartelak. Gidatzen laguntzeko EKObus sistema ere ezagutu dute. Sistema aitzindari hori ere Donostiako flota osoan dago erabilgarri. Eraginkortasunez gidatzen laguntzeko sistema batez eta anti-bunching sistema batez (autobusek bat ez egiteko sistema) osatuta dago. Gidariari laguntzen dio era ekonomikoan eta ekologikoan gidatu dezan, erregai fosilen kontsumoa eta kutsatzaileen igorpena gutxituta eta, aldi berean, linearen maiztasuna eta puntualtasuna mantenduta. Euskal Eurohirian garraio publikoa sustatzea helburu duen E-MOBASK proiektu europarraren barruan sartzen dira sistema biak.

Sistema horiekin batera, ordezkaritzak geltokiak sentsorizatzeko sistema ere ezagutu du, geltokian dauden erabiltzaileen kontaketaren ia kontrol zehatza egiteko aukera ematen duena, eskaera aurreikustea ahalbidetuta. Ildo horretan, big datatik abiatuta Konpainiaren autobusetan bidaiatzen dutenen jatorria-helmuga matrizea eraiki dezakeen programa berritzaile bat ere badu. Autobusetako ticketing datuetatik abiatuta eta algoritmo matematiko bat erabiliz, erabiltzaileek egin ohi dituzten bidaiak osatu ditzake. Hau da, erabiltzaileek egin ohi dituzten bidaien erregistroa hartuz jakin daiteke zer geltokitan igotzen eta jaisten diren erabiltzaile horiek, haien jatorri-helmuga matrizea, alegia.

Hitz batean, kontua izango da zerbitzuak modu eraginkorragoan antolatzea eta planifikatzea sistema hobetzeko eta erabiltzaileen premietarako egokia den garraio publiko bat eskaintzeko.

Dbusen oso garrantzitsutzat jotzen dugu nazioarte mailan hiriko garraioaren hobekuntzan lanean ari diren enpresa eta erakundeekin harremanetan egotea, bere testuinguru partikularreko premietan zentratuta baina ikuspegi globalarekin, izan ere, kanpoko esperientzietatik ikasteko aukera ematen du eta etorkizuneko ikuspegi berri bat ere bai, lankidetza berriak eta baterako proiektuak sortzeko aukerak irekitzeaz gain.

•
19 Maiatza, 2022
By Esti
In Berriak, Berriak home, Jarduerak

Irakurri

Category : Berriak

5G Euskadi proiektuari buruz